U Manifestu di Bruselli
Puru ca u sicilianu cci àvi na storia e na tradizzioni ca càmpanu di sèculi, s’assuppau tuttu un prucessu di stigmatizzazzioni, cinzura e fu bullatu comu un «dialettu» senza dignità. Àvi dicini d’anni ca ê picciriḍḍi siciliani si ci nzigna ca parrari nnâ lingua matri d’iḍḍi è cosa sbagghiata, picchì vastasu, vasciu e sparti di malavitusi
Accussì u sicilianu, macari ca pruducìu tanti òpiri di littratura e macari ca fora u vìdinu comu prizziusu, adaciu adaciu arrìsica ca scumparisci.
Di ḍḍocu nascìu un manifestu di ubbittivi, scrittu doppu di na samprea nnô Parramentu Eurupeu di Brusseli nzèmmula a tanti assuciazzioni e avanzata di l’eurudiputatu Gnazziu Currau.
Comu puntu d’arrivu vulìssimu ricògghiri u sustegnu dî stituzzioni e di l’assuciazzioni lucali pû ricanuscimentu dû sicilianu comu lingua co-ufficiali pi manu dâ Riggiuni Siciliana.
Adunca addumannammu ê cumuna di fari na Dilìbbira di Cunzigghiu Cumunali, unni dìcinu di spàrtiri u senzu dû manifestu e di muvìrisi pi quatilijari a lingua siciliana.
U Manifestu
Cu' firmau?
Cca appressu cc’è na mappa cu tutti i cumuna chi, câ cullabburazzioni dû gruppu d’attivisti Trinacria, nzinu ô 30 di marzu 2025, firmaru a dilìbbira unni appòjanu u Manifestu e unni addumànnanu u ricanuscimentu dâ lingua siciliana comu cu-ufficiali â Riggiuni Siciliana.
Sta mappa veni attualizzata cu ogni appruvazzioni chi n’arriva, adunca ti cunzigghiamu di turnari spissu pi vìdiri si cci sunnu nuvità!
Comu vi pozzu ajutari?
Parra chî pulìtici dâ to città, parra cû sìnnacu, cu l’assissura. Parra macari chî to pajisani. Cerca di capiri si cci po èssiri un cunzenzu ncapu a stu Manifestu. Comu ca fussi, cca appressu trovi soccu mannammu pi PEC a tutti i cumuna dâ Sicilia, capaci ca ti ponnu sèrbiri.
